Ventiséis entidaes piden a los grupos parllamentarios un compromisu mayor de RTPA col asturianu

Foto: EUROPA PRESS

UVIÉU, 20 Feb. (EUROPA PRESS) -

   Más de ventiséis entidaes suscribieron un manifiestu dirixíu al Gobiernu d'Asturies y a los grupos parllamentarios pa que los medios de comunicación autonómicos "contribuían al procesu de normalización de les llingües d'Asturies garantizando y promoviendo una industria audiovisual".

   Pa ello, los firmantes piden a los grupos representaos nel Parllamentu rexonal y al Executivu asturianu qu'incluían les sos piticiones, recoyíes nel documentu Cinco puntos por unos medios públicos al serviciu d'Asturies, na Llei de RTPA nueva, que se ta tramitando nestos momentos na Xunta Xeneral.

   El documentu surdió de la Xunta pola Defensa de la Llingua y, amás d'otres organizaciones asturianistes, contó col apoyó de sindicatos como CSI o Suatea, el Conseyu de la Mocedá d'Asturies y el de Xixón y de colectivos teatrales y musicales, amás de la mesma Academia de la Llingua, entidá que fixo d'anfitriona na presentación del manifiestu.

   El testu recueye la necesidá de que RTPA sía una parte activa nel procesu de dignificación del asturianu y del gallego-asturianu, "con conteníos empobinaos al interés públicu y de producción propia, asumiendo un rol compensatoriu d'otres cadenes", amás d'un "referente" nel panorama audiovisual asturianu, "convirtiéndose nel principal impulsor del mesmu".

   Los firmantes señalen que la situación actual, cola llei tovía vixente, permite que l'asturianu tenga una presencia de namás el 5% de la emisión en TPA y el 2% en RPA, "cuando son los programes que tienen más audiencia". Tamién indiquen que ye fundamental que los asturianos vean los medios públicos como un serviciu que forma parte de la so identidá, "p'asina asegurar el futuru de la cadena y la so aceptación social, porque nun queremos qu'a RTPA-y pueda pasar lo qu'a Canal 9", sentencien.

   Falen de la importancia del doblaxe al asturianu y de la promoción de los sectores culturales na programación, "dalgo que permitiría'l nacimientu d'una industria". Ponen como exemplu'l casu de Galicia, onde l'aparición de TVG xugó un papel fundamental nel nacimientu d'una industria del doblaxe, "que mantién a 300 persones y a seis empreses, pero TPA ye la única televisión europea d'una comunidá billingüe que nun emite programación pa los más neños na llingua propia".

   Pa les ventiséis entidaes, "TPA namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu".