Ventiséis coleutivos roblen un documentu nel que demanden una RTPA “al serviciu d’Asturies”

Pablo R. Guardado

La sociedá asturiana mueve ficha énte la llei de reforma del sector públicu que va regular a la RTPA. Ventiséis coleutivos roblaron un documentu con 5 puntos “irrenunciables” nel que demanden “unos medios públicos al serviciu d’Asturies”.

La Xunta pola Defensa de la Llingua Asturiana (XDLA) foi la organización que promovió la redaición d’un testu que contó col sofitu d’una bona riestra d’asociaciones cíviques y de l’Academia de la Llingua Asturiana (ALLA). Precisamente, el llar de la institución académica foi’l llugar escoyíu pa facer públiques les demandes de los ventiséis coleutivos que roblen, en primer instancia, el documentu. Ana María Cano, presidenta de l’ALLA, encargóse de facer la presentación d’un escritu que tien el so orixe nel procesu de tramitación na Xunta Xeneral “d’una nueva llei que va regular la Radio Televisión del Principáu d’Asturies” y que “l’Academia de la Llingua Asturiana asume na so totalidá” al entender necesario “que la llingua y la cultura d’Asturies s’inxerten d’un mou afayadizu dientro la programación”.

“El nuesu enfotu ye que los plantegamientos que se faen nesti documentu puedan ser recoyíos y asumíos polos representantes del pueblu asturianu na Xunta Xeneral y que realmente los lleven a esa llei que tán tramitando nesti momentu. Nun podemos escaecer que la televisión y la radio autonómiques son, dende llueu, elementos importantísimos na cohesión social de la sociedá asturiana y elementos de primer orde en tolo que tien que ver cola normalización llingüística; d’ehí que sía tan importante que la llingua y la cultura d’Asturies s’inxera d’un mou adecáu dientro de la programación”, continuó Cano enantes de dar la pallabra al periodista Damián Barreiro, persona encargada, en representación de la XDLA, de dar llectura al documentu, de nome ‘Cinco puntos por unos medios públicos al serviciu d’Asturies’.

Nun primer momentu, fai una esplicación del contestu actual, nel que ta en marcha la segunda llei de reforma del sector públicu, siguiendo los mandaos d’austeridá, qu’afeuta a la Llei de Medios de Comunión Social. “Ye de reseñar que la llei actual señala ente los sos oxetivos la promoción de la cultura y educación ‘con especial protección del bable, mediante la promoción del so usu y espardimientu nos medios de comunicación’. Sicasí, esa especial protección nun llegó a más d’un 5 por cientu de la emisión na TPA y un 2 por cientu en RPA, mentes que na web rtpa.es l’asturianu cuasi nun existe. Por eso, pareznos que resulta evidente que la llei tien que valir pa recoyer explícitamente la necesidá de que la televisión y la radio autonímica xueguen un papel fundamental nel procesu de normalización social del idioma”, lleó Barreiro, que recordó que “hai díes de la selmana nos que nun hai programación n’asturianu” y que nun esisten espacios na llingua propia destinaos al públicu infantil, una situación qu’impide la creación d’una industria del doblaxe nel país que podría xenerar puestos de trabayu. Tamién denunció’l “vetu” al asturianu n’espacios informativos y deportivos, y l’ausencia “del sector lliterariu, musical y teatral na mayor parte de la programación, cuando son entidaes básiques pa l’articulación d’una industria cultural”. “Y ye que la televisión que paguen tolos asturianos nun respeta lleis básiques como la Carta Europea de les Llingües Minoritaries, l’Estatutu d’Autonomía o la Llei d’Usu”, continuó’l representante de la XDLA.

El documentu espón que la “TPA namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu”, en referencia a la competencia amplia esistente cola llegada de la TDT. “Ye fundamental que los asturianos vean los medios públicos como un serviciu que forma parte de la so identidá, dalgo fundamental p’asegurar el futuru de la cadena y la so aceptación social. Nun queremos qu’a RTPA-y pueda pasar lo qu’a Canal 9”, continúa’l testu, entantes de dar pasu a los cinco puntos “irrenunciables” que “tienen de recoyese na llei nueva de RTPA, dalgo que pidimos al Gobiernu d’Asturies y a los partíos con representación parllamentaria”. Estos son los siguientes:

1. RTPA tien qu’ufrir un serviciu públicu pa la sociedá asturiana al traviés d’una programación de calidá nes llingües propies d’Asturies, plural y respetuosa coles audiencias, con conteníos empobinaos al interés públicu y de producción propia, asumiendo un rol compensatoriu d’otres cadenes públiques o privaes.
2. RTPA tien que cumplir l’oxetivu fundamental d’impulsu y normalización del asturianu y del gallego-asturianu.
3. RTPA tien que ser exemplar nel so compromiso colos elementos fundamentales y actuales de la cultura asturiana.
4. RTPA tien que ser un referente nel panorama audiovisual asturianu, convirtiéndose nel principal impulsor del mesmu.
5. En resume, RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y promoviendo una industria audiovisual que garantice la producción d’estos conteníos.

Los coleutivos que roblen esti manifiestu, amás de la XDLA y l’ALLA, son l’Asociación Cultural Rapalacóis, l’Asociación de Trabayadores pola Normalización Llingüística, Ástura, Atenéu N’Alfoz, Banda Gaites Ribeseya, Colectivo Trafego, Conceyu Universitariu pol Asturianu, Conseyu de la Mocedá del Principáu d’Asturies, Conseyu de la Mocedá de Xixón, Corriente Sindical d’Izquierda (CSI), Ensame Xuvenil Trisquel, Foroescena, Fundación Belenos, Fundación Caveda y Nava, Grupu de Baille Tradicional San Félix de Candás, Iniciativa pol Asturianu, Producciones Nun Tris, Reciella, Sociedá Cultural Xixonesa, Softastur, Sindicatu Unitariu Autónomu de los Trabayadores de la Enseñanza d’Asturies (SUATEA), Xeira, Xunta Estudiantil Asturiana y Xunta Moza. El testu completu va tar disponible nel blogue ‘Cinco puntos por unos medios al serviciu públicu d’Asturies’. Toles entidaes que deseen sofitar el documentu pueden facelo al traviés del corréu electrónicu 5puntosxrtpa@gmail.com.

Xuntes de l’ALLA con Virgili

Nes entrugues posteriores por parte de la prensa presente nel llar de l’ALLA, Cano nun quixo esviase del motivu del actu, anque sí señaló que nos alcuentros que vien calteniendo con Antonio Virgili, direutor xeneral de la RTPA, y representantes de Política Llingüística “la disposición en teoría ye amable y bona, y los resultaos hasta’l momentu son pocos. La xida que se pon casi siempre son cuestiones presupuestaries, que nun tienen personal formáu, etc.”. Al respeuto, comentó qu’hubo un cursu d’asturianu pa la plantiya del ente “con una bona acoyida y bonos resultaos, que seguramente sedríen meyores en cuanto a participación de sofitase más dende dientro”, y apuntó que ye posible que se puedan algamar más avancen na radio que na tele “a curtiu plazu”.

Tanto Cano como Barreiro recordaron que los programes n’asturianu de la TPA tienen “unos índices d’aceptación superiores a la programación que se fai en castellanu”, con una cuota de pantalla del 10 por cientu cuando la media de la canal ye del 4 por cientu. “Ye dalgo lóxico, yá que la sociedá asturiana quier vese na so televisión, non ver lo mesmo que n’otres cadenes”, añadió’l periodista. Por último, énte la entruga de si la oficialidá impediría una situación como l’actual, la presidenta de l’ALLA respondió que “evidentemente, si l’asturianu fore llingua oficial, esti tema taba soluciónáu; ésti y tolos otros que tenemos en rellación a la cultura y la llingua d’Asturies. Si la llingua ye oficial nun van poder poner la escusa de la que llingua nun ye oficial”, pa depúes añadir que cumplir con estos cinco puntos “nun ye una cuestión de presupuestu, sinón de voluntá política”.

FONTE: ASTURIES.COM