Cuando
cuasi naide apostaba por una radiotelevisión pública asturiana, el movimientu
de reivindicación llingüística yá reclamaba la so esistencia, como
importantísima ferramienta de normalización del asturianu. Dempués, aquellos
que nun la queríen, sumáronse, y fundóse la Radiotelevisión del Principáu
d'Asturies. El restu de la hestoria yá la conocen. Una radio y una televisión
na que l'asturianu tien una presencia marxinal, menos d'un 4% nos primeros
cuatro años. Esto ye, la televisión asturiana emitió más hores d'autopublicidá
que de programación n'asturianu.
De
nada valió que los pocos programes qu'entamó la TPA na nuesa llingua tuvieran
siempres penrriba de la media de la canal y que dalgunos d'ellos se
convirtieren en verdaderos fenómenos sociales n'Asturies. La dirección de la
RTPA negóse a ampliar la presencia de la llingua asturiana, ya inclusive esta
vese agora amenorgada. Los pocos programes qu'usen l'asturianu son arrequexaos
a horarios mui concretos y fuera de los momentos de máxima audiencia.
Nun
s'entamó nenguna esperiencia de doblaxe de películes o series al asturianu,
mientres nel sector priváu sí se tán faciendo y con mui bona aceptación del
públicu. Nun se fizo nin siquiera un solu informativu n'asturianu en televisión
o radio, nun se retresmiten partíos na nuesa llingua, nun se ficieron series
nin nada de nada... nengún conteníu que pueda facer normal al nuesu idioma, esa
ye la norma d'esta RTPA.
Va
muncho que se sabe que profesionales de la RTPA con formación y ganes d'usar
l'asturianu, nun podíen facelo, pero estos díes un "Manual de
rotulación" de la canal, marca les llinies d'estilu. Básicamente evitar
cualesquier pallabra n'asturianu, llegando a encamentar dexar d'usar pallabres
como "argayu", que tovía se colaba en dalgún informativu, y lo que ye
tovía más grave, evitando l'usu de la toponimia oficial d'Asturies, torgando'l
so usu al máximu, incumpliendo la normativa llegal.
Esta
nun ye la radiotelevisión que queríemos, esti nun ye'l proyectu audiovisual que
necesita Asturies y la llingua asturiana. Ye necesariu un cambiu radical na
mesma, que por fin asuman los mandatos llegales del Estatutu d'Autonomía y la
Llei d'Usu del Asturianu, qu'obligen al Gobiernu d'Asturies a promocionar
l'asturianu nos sos medios, amás de nos medios privaos.
Los
asturianos yá pagamos por una televisión en castellán, TVE, y nun tenemos
porque pagar por dos televisiones, mientres nun tenemos una qu'use l'asturianu.
Si nun se convierte nuna ferramienta de normalización de la nuesa llingua, nun
queremos pagar por una radiotelevisión más. Esta nun ye la RTPA pola que tanto
lluchó'l movimientu de reivindicación llingüística.
FONTE: INICIATIVA POL ASTURIANU
No hay comentarios:
Publicar un comentario